واللي زيك يحب ايه ؟
ويحب مين ؟
وهيبقى حبك جوه قلبك
ولا هيبقى باين عليك

ومين يستاهل ابتسامتك
ومين اللى قادره واللى نادره
اللى هتعيشها جنبك ؟
هتبقى بيضا ولا سمرا
قمحاويه ولا شقرا
عنيها سودا لون عينيا
ولا عسلي بلون عينيك ؟

و هتحبها بتقرا لمين
و ودنها بتسمع لمين ؟
هتحكي عنها إيه لِِ ناسك ؟
وقولّي يوم ما تقول " بحبك "..
هتقولها عادي
ولّا لازم ليك ( مناسك ) ؟! ♥

طب وصوتك لما تبدأ
هيترعش ويّا شفايفك
ولّاهتسكت
وتنطق الكلمه بعينيك

طب انتا عارف
وكلام فى سرّك
أنا روحي دايبه حب فيك
مهما أقول العكس ليك
ومهما اعمل مقدرش أكمل
يوم حياتي الا بيك :)

100 وش

بصراحه وبإختصار

أنا بـ ميت وش

فيهم اللى ناقص

فيهم اللى صادق

فيه اللى مليان غش

وفيه اللى حب وأجرّلٌه عش

وفيه اللى داير على حل شعره ,

من كتر وعوده مبيتفتكرش!..

ومني اللى هج مبقتش اشوفه

ومني اللى نخ وكسرني خوفه ,

ودفنلى راسي كما النعامه

ده منى اللى صاحب فى ناس م اللمامه

ودار ع القهاوي .. وغنّى فى حكاوي

وعدِّل فى عوده ونحنحلي صوته

وقسِّم فى لحنه ع المغربيه

ومني اللى يشرب كل الإزازه !

ويصبح مدهوِّل ويسأل لماذا

ويمشي بضهره ويستغربك

ويكسر إشارته يعوز يضربك

و مني اللى عاقل مالوش فى الخناق

وكلامه هادي تقولشي بزواق

وجوايا كمان كام طفل فى جنان

يكسّر .. يزعّق فيتعب ينام

ويصحى يصالحك بضحكه ويدهشك

بكام حركه حلوه عملها وتعجبك

ومني اللى زاهد فى حلو الحياه

ومني اللى طمعه ده زوِّد شقاه

ومني اللي رضي وصبر ع الصبر

ومني اللى وصل فى حزنه منتهاه

ومني كمان ييجي ميت لون ولون

أو أكتر ده يمكن يتعدّوا بألاف !..

نفسها !

نفسها تعرف
كام مرة
في صورتها
بتسرح

وكام مره
بتقلّب فى رسايلها
وانتا
مشتاق ليوم
تشوفها فيه
وتفرح ..

رسالة شعبيه

يهيب الشعب بالمجلس
أن ينصت مهتماًً بينا
وأن يعلم ما عادت يده
خِل وفيٌ لإيدينا
وما عادت رسائل معسوله
تنادي دموعاً فى عينينا

و ما عاد مثيرٌ للشغبِ
يثير فى نفوسنا حفيظه
بل صار عريسا لبناتي
اتباهى بثورته سنيناًً

وينوه الشعب بإصبعه
أن تلزم ثكناتك أمراًً
وتسلمنا السلطة جبراََ
وتدرك إثم فلتاتك
وإشاعة أنك حامينا

هذا وأخيراََ بنؤكد
أننا بالفطرة كرماء
وإن جئتونا طلبا للصلح
سنسامحكم كالطلقاء

والله موفقنا دايماََ
إلى عدلِ منهٌ يرضاه
ويوصلنا ل عيشه كريمه

وجهة نظر 1

و إحساسك بالدفا

بدايته رعشة برد ..

والصدق لاجل ما يتعرف

لازمله لسعة غدر ..

دايماََ يمر بيك العكس

قبل مواسم الفرح ..

وكل توهه تعدي بيها

هيَ مفتاح الفرج !..

دٌنيا !

بتعيط

و تقول ملهاش فرحة بتكمل

ولا حزنها بيّكنّ

كل اللى تتمناه يتمـنـّع عنها

و أول ما تنسى .. ييجي

و على بابها يزنّ

و أهي هيَّ الحياة كده

عِنديّة وتدي على مزاجها

و الحلم بكل تخطيطه

محتاج إمضتها

لـَـجل يتم

حٌـبــ♥ــك..

وحٌبك كحـَـب عـِـنَـبِِ

اختـَمـَرَ بـقـلـبي

فأسكرني ..

♥

ولاد الكلب ..

قلعتوا وشوش كتير
وخليتوا ليكو الاوحش

بتغنوا لناس كتير
وتحبوا منهم الاخرس

اشتقتوا للعصافير
وطلقتوا نسوركوا تنهش
رافقتم سواد الليل
وكلاب وراكم تلهث


افعالكوا ليه الغير
تقولوا وتعملولنا العكس
والعبد قال صادقين
والحٌر قال برّة

ياللى غيّمتوا سمانا
واتحنيتوا بدمانا
بتعوموا فى الدنانير
وأنتوا فيها الأرخص

قهوة سادة ..

صبّلنا القهوه يابني
متنساش عاوزنها ساده

نشربها فى كل جمعه
على دقون الساده

شطار متفوتهمش سنه
وبينسونا فى كل جمعه

عايزينها إسلامية
وبـالعسكر متحاميه

وأنا عاوزها مدنية
وتتشبه بالمدينة

بدستور مواطنة حر
زي ما قال نبينا

و صدقنى انا ابن بلدي
وأمي بجلابية وطرحه

لا عايزها تبقى مرقص
ولا بالمنكرات دي سارحه

ولا عايزها تبقى معبد
ولا ببروتوكولات صهيون

رايدها تبقى محفل بالديانات وبالبشر
والكل يبقى واحد و الفتنه تٌغتفر

والمادة التانيه ثابته
على عيني وراسي ديني
لكن القانون لوحده
يحكم بينك وبيني

مش عايز جلاد بيؤمر
ولا بدقن وسبحه تكفر

والحاكم لما يغلط
واحاسبة فى المحاكم
مبقاش كافر وملحد
وخروج عن الجماعة ..

الهمزه ..

الهمزة أول حروف الهجاء

و عندي أنا اعتزال لشعر الهجاء

الهمزة عندي بداية جديدة

مش مكتوبلها فصول انتهاء

و مايليها من حروف

ليس بباء و ينطق حاء

و الباء بعديه

منطوقة بضمّة شفايفنا

مطبوعة بأول بوسة

مخطوفة منك على استحياء

و الكاف كمالة فى حبنا

مقطوعة من كراريس

كتبنا فيها الجوابات

كتبتي واحشني

وكتبت أحبك

كتبنا

وفى حروفنا الروح

وحروف الكل

من بعدينا

جماد

محتار

محتار أنا

و حيرتي بـ لوني بهتانه

و إن كنت وسط زحام

عيوني بردو سرحانه

شارد فى الملكوت

أحلامي سهتانه

لا بفكر فى شيء

و لا فيه للفراغ خانه

حالة كده م اللاعدم و اللاوجود

أفكاري أيوه هربانه

لكن بتشغل حيز

دايماً م الونس مكروه

و الوحده ما بتميز

مليان كراكيب ودوشه

و عقلي م الجنان اتمسّ

و حبيبتي محتاجه خَوتَه

لاجل لكلامي تحس

و مشاكلي سارقه دماغي

و عمّاله فى نفسي تحزّ

أنا بس 

نفسي أعرف

امتى بقى

أفرح

والحزن من قلبي

يفزّ

ومن يدري الخبايا ! ..

استمرت تسرد لهم خطاياه وفلتاته
لا تذكره إلا بكل سوء
تحكي للجميع كيف تخلصت من حبه
تبالغ فى تشويه حكايتهم
وحين تخلو بنفسها
تبكيه بحرقة ارملة اختطف القدر حبيبها
فـلا هو يعود ولا هي تنساه
ويظل وفاء القلب له ورهبانيتها
مستترا وراء ادعائها عدم الاعتراف بما يسمى الحب !

قالو عنهم ..

قالوا عنهم ..
ربما كان يمتلك قدرا من السذاجه جعلته يحاول الابتعاد عن فتاة مثلها ..
ولكن الأكيد انها كانت تمتلك قدرا من الذكاء ..
لأنها ساعدته على ذلك !

محبّه لـ ..

إنها محبّة – وإن لم تدري- لإيذاء نفسها,فهي ..
تثق بغيرها بسهولة ,
تقود بسرعه جنونيه ,
تتناول أقداحا من القهوه تفوق وزنها ,
تكوي رئتيها بـ السجائر ..
وتٌنهِك قلبها بحبه !!

ليتنى عدم
فلا يحاسبني ..
ليتنى عدم
كما تعتبرني !

الحدوته كامله من هنا :)
https://www.facebook.com/photo.php?fbid=241867579168803&set=a.235636773125217.58096.235230656499162&type=1

فلسطـ♥ـين

في ظل القهر .. والحصار ..
أراكي يا فلسطين كـ فتاة فى مقتبل عًمرها ..
تحتمي - صورياًً - بإخوانها اللذين لم يشتد عودهم بعد
تتعشم فيهم العون والسند .. تنتظر يوم أن ينتفضوا لنجدتها
فرض القدر عليكى أن تتحملي لحين أن يبلغوا عمر الجهاد ..
ولكني اطمئنك أنهم قد اجتازو مراهقتهم من الخنوع والتردد وانسلخوا عن تخوفاتهم الطفولية
وإن نصرالله لك على أياديهم لقريب ..

سـجنها هو الكـــون !
وتكبيلها بـوريد قلبـ♥ـك .. حريــتـــهــا

- ل فاطمة النقـيب

الحدوته كامله من هنا :)
https://www.facebook.com/photo.php?fbid=236081923080702&set=a.235636773125217.58096.235230656499162&type=1&ref=nf

طيور الوطن

أصَلّي.. و أسَمّى .. و أدعيلـِك


يطيِّب ريقك الطاهر


اللى روي الشرايين


بشربه هنيه من نيلك


يحنن بيها .. قلوب قاسيه


يفكر بيها .. عقول ناسيه


إن الوطن ماهوش عنوان


ولا خانه فى تأشيره


ولا فى باسبور


إن الوطن ده برج حمام


يلّم الشمل


و يجلي م الضنا والبور


و إن يوم تهاجر


يا طير يا زاجل


ما تلقى زي حضن الوطن أحضان


و يظل ريقها العنبر


يدوّي فى كل منبر


يحايلَك لاجل ما ترجع


و أصَلّي و أسَمّي و أدعيلـَـك


ما يحرم عينّا من ضيَّـك


و ما يحوج جيبنا للغربه ..

مٌعلِمها الأول ..

استنكر – بسذاجه – تغيرها
أدهشه كونها تلميذه نجيبه ! ..
حفر فيها دروساً بنار التجربه فما كان لها إلا أن تحفظها عن ظهر قلب ..
و المدهش هنا هو اندهاشه ذاته !
أليس هذا ما زرعته يداه , فلما يتبرأ من الحصاد ؟!

ألم يكن من علّمها الجنون ؟
ألم يجردها من الفواصل ,
من البدايات , من النهايات , من الواقع ! ..
أنساها لمَ خٌلِقـَت .. سخرها لعبادته ..
ولكن يا لعدالة القدر الذي اقتادها للجنون
حتى إذا خانها الحبيب , أوصلها الجنون إلى يمة النسيان , حيث التوابين الأوابين عن الحب ..

دعوني أٌبرر أيضاً شجاعتها .. ربما واسيت عليه صدمته ! ..
فهو من أذاقها مٌر نعم , فسلخها من زي المطيع لأوامره ,
أكسبها شجاعة الاعتراض والاستساغه لكلمة لا فى دفاع صريح عن طاقة احتمالها ..
فلم تعد مٌحبه للإنكسار ..

ولكني اعترف بأنها مٌدانه له
بجميل ربما دفعت هي ثمنه مقدماً ! ..

فهو يستحق لقب معلمها الأول الذي علّمها المعني الحقيقى للحب
وأن كل ما يشبه حبها له ..
ماهو إلا مشاعر مغلوطه مٌلتبسه من الإيثار والوفاء ..
انتجت حباً مميتاً للتضحيه

والأكبر من ذلك أنها استشفـّت منه فن الحياة ,
فعرفت أن السعادة وقتيه ,
و الطيبه تٌبخِس حقها فى أي ديّه ,
وأن الملائكة النقيه إن قابلته ..
لأحترفت على يديه
ألاعيب الذئاب ..

رقصة الوداع !

حبكت ربط حذائها

بـ قوه و كبرياء

فقد كانت تحبٌك رباط جأشها معه

كمن تلف جبيرة على قلبها المجزوع !

عدّلت من رموشها

أفرطت فى وضع الماسكارا

لتكسب نظراتها مزيداً من الحده

التى توائم ذلك الكبرياء

و ما أن رٌفِعَت الستار

انسابت موسيقى ناعمه تلٌـف الأركان

و ابتدئت الطقوس

إذا بها ترتمي فى أحضانه في رقصة الوداع

و يدورا معاًً في فلكِ متصل .. ثم ينفصلا

تقف هي على أطراف مشاعرها

ثم تنحني على ذراعيه

فيقذفها لأعالي الاغتراب

و يلتقفها على عجل ليعيد قذفها من جديد

فتلتف على أنفاس أشواقها

وتنزل بثبات على المسرح

يقترب منها ليعيد كرته !

يمكن ..

أو ليتفنن فى تعذيبها بأشكال اخري !

جائز..

و لكنها تبتعد مع كل خطوة إقتراب

حتى اختفت أنفاسه من محيط أنفاسها

و تعلو الموسيقي فى تصاعد تدريجي

ثم تصل للذروه لتتوقف فجأه

وينسدل الستار

للتنتهي الحكايه ..

شجرة حرّه ..

كـشجرة حرة هي

ماتت راسخه ناظره لأعلى ,

من يراها حسبها قويه

و لكن الألم ..

أن ما بداخلها خواء ,

فكل المشاعر قد أفضتها بقلبه ,

و أرتشف عاطفتها بكل نهم ,

حتى رحيق عيناها الأخاذ

نثره بإفراطِِ على ثيابه ,

وفى لياليه المٌحلِكه

استأنس بها

ثم  تركها  فى  خلوةِ  وحشاء ..

بيانو ..

جالسةٌ فى السواد .. 

مٌغمِضَه لجفونها ..

وبياض أياديها ممتزجاً بأصابع البيانو ..

تكاد تٌجزِم أنها لن تنتبه إن نفخت ببوقاً إلى جانبها ..

وهي كذلك منذٌ حين ..

تعزف تلك المقطوعه

اللتي علّمها إياها

قبل الرحيل ...

شهيد

و كأني نايم في توب جميل

أبيض في أبيض منقوش نخيل

وخير .. اللهم اجعله خير !

أصحى على صوت نواح وعويل

دي عيلتي دي المِتجمعه ؟

طب ليه عينيهم مدّمعه ؟

وجيراني ليه بيواسوا أمي ويطبطبوا

وعيونها امتى للعياط هيبطلوا

لا يكون ده صوان وفاتي ؟!

ويكونشي ده تأبين مماتي ؟!

مش لو كنت أنا

مٌت أساساًً !

كنتوا ساعتها تزعلوا ؟

عارف لفراقي بتندبوا

لكن يا ريت تتمهلوا

وتفكروا

لإن الإصابه

لو مش بالرصاصه

كانت هاتبقى

بميت طبنجه متعمرّه

بـِ علّه ومراره

وحياه م الهموم متكدره 


كانت هاتبقى

في غرق العباره

ولّا

في وقوع أي عماره

أو حتى

في خناقة

على عيش

في زنقة حاره ..

هروب !

شَرعَت فى إغلاق النوافذ والأبواب ..

أنزلت الستائر,

أحكمت الأقفال ,

ولكنها

ما زالت تشعر به يتابعها,

يكشِف تحركاتها,

يٌنصِت لأنفاسها,

فـ أدركت .. اخيراً

أن ما تهرب منه بداخلها

وليس بالخارج !..

شـَجـَن

من كٌتر الشوق والغناوي

تاه الزعل بين القلوب

رجعت تحبه من جديد

وافقت تخاصم العناد

و تهد كل أسباب الوجع

اللى نسجها من حديد

 

وعاشت تتفِّه من حيرتها

صارت تقل كمان غيرتها

  

نسيت شغفها بالورود

زي احتياجها للغزل

نسيت و فكّر قلبها

إن حبيبها مالوش وجود

و من كتر الغربة فى التلاقي

سكن الشجن فى جبال تلوج

خسرت بفوزها !

كان يخبرها أن حبها يكـبـٌر فى قلبه كل يوم .. و كان هذا ليسعدها حقاً
و لكنها  تعلم سر ذلك .. فما كان لكلامه إلا أن يوجِعها
فما  يزداد بقلبه ليس حبها  .. بل حب امتلاكها


كان يقارنها فى كل لحظه و كل حين بكل امرأه يراها أو يعرفها
و من الجيد أنها فى نظره تفوز فى المقارنه دائماً ..


و لكن فى الحقيقه قد خسرت بفوزها
 و هن من يكسبن فى المقارنة الكبرى .. هن أكثر حظاً منها
 فليس على إحداهن أن تفقد جزءاً من كرامتها  مع كل مقارنه


لأنها ارتضت رجلاً يضعها خانة فى جدول ,
يحصرها فى قائمة مميزات


يحتفظ بها لأنها الأذكي .. و الأجمل .. لأنها الأفضل
وليس الأحب ..

شيخ المنصر !

من يـومـه و ده بـارم ديلـه


و الديابه متمرمغه فى خيره


و كلابه تنهش فى قوت الحي .. وتديلٌه


ميعرفش أبوه .. ميعرفش أخوه .. ميعرفش ربـه


و إن جيتــلٌـه نـاصح .. متأمنش رده


يـصد عن رزق الحلال .. و لغير الحرام مــا يـشـتهي


شيطــانــه تــاب .. و هو جــاير مــا يـنـتـهي


الحريه و العداله و الكرامه الإنسانيه .. كلمات من قاموسه ملغيّه


 و إن كنت حربايه .. و شروط نفاقك مستوفيّه


تكسب معاه .. و تنول جوايز تعبيريه


و إن كنت يا فالح بتحب الليبراليه .. قليلٌه يلبسك قضية


أما لا سمح الله كنت بدقن أو جلّابيه .. فأمرك سهل وملكش ديّه


مش هيقولّك أنا ربـكم الأعلى ..


وميهموش تـسـجـد لـمـيـن ..


لـكن يـهــمه


لمين هـتقـدّم الـقــرابـيــن ..

برج الحظ

ومن الشهور السريانيه ..


أنا اتولدت فى آب


قالولي ده برج للأغنيا ..


وليده شجاع .. ماهوش كذاب


مشاهيره بونابرت والأخ جوته ..


وغيره وغيره من زين العباد


قلت أنا كلام جميل ..


لكنـّي غير ..


 ومش زي ما بيقول الكتاب


أنا واد محنجل .. وده ليّا غيّه


بعيوني أعلّق أنا دي وديّا


ولساني ده , له الشعر شاب


وجيوبي أهيَّه .. ما فيهاشي إلا قيمة اليوميه


قولولي بس مين حط صفة الوجاهه فيّا !


وكمان زادولي فى وجع الراس


وقالولك إن حجري المفضل ياقوت وماس !!


دنا يابن عمي مراري طافح ..


غلبان مأشفر


ياخي فوق وكبرّ


ولا ليه تعبرّ


جرا إيه يا سيدنا ؟


حاول تفيدنا


بطريقه تانيه مافيهاش بلاده


محسوبك أصله أصل اللماضه


ومالوش فى حظ ولا فى أبراج


ولا عمره وشوش فى يوم وَدَع


 ولا يوم هيدمن رمي البياض ...

عشوائــي

وكتير بحتاج حاجات
معرفش إيه هيَّ !..


ويربطني قلبي بشىء
وما ألقى فيه مزيّه ..


و أسلك طريق طوّالي
وكأن فيه لقيه ..
ألقي منحنى جارف
قتيله ملهوش ديّه ..


وأتغاظ من المسافات
 وأحتار فى مواصله بينيه ..


وحلول بكام خطوه
أختصرها أنا فى أغنيه ..


أوقات يحالفني حظي ..
 و أوقات يسبني رميّه ..


إستعجالي ده فطره ..
عشوائي فى كل ما فيا ..


أحِب  بسرعه  ..  بدون أسباب
أحب و أسيبها ع المولى
و أرجع و أقول شعور كذاب
فـ اسيب  تقولشي دي مقاوله !

و لا يجرحني فراق و بعاد ..
و لا يجمعني بسلامهم رد ..

مانا اصلي كمان نسايّ !..
مابعينشي ولا ذكرى ..


كل اللى فات بالجاي
فى دماغي يتبدّل ..


تفتحلي قلبي بناي
ولا عزف هيعلّم !..


لا بحاول أتغير ..
ولا ناوي أتغير!!..


أنا أصلي كده أريح
 حتى لو لغيري العكس ..


هيفدني إيه نواحهم ؟!
لو  عقلي صابه اليأس !..


هيداوي إيه صراخهم ؟!
لو قلبي بطّل رقص ..
وع النبض اتكتّم ..
وفى النعش اتدارى ..
من ذكرى جرحتني !

قطر قـشّـاش

آه يا قلبي ..

يا قطر يا قـشّـاشّ

ما يدوم له صاحب ولا احساس

تتحمل اوي .. وتحضن اوي

وفى آخر محطه تـنساب م الناس ..

وكراسي تفضى ..

وحكاوي تفضل ..

وتبقالي إنتا

تشتاق لـراكب

كان عشمى يرضى

ويدنـّـه راكب

لكنه سابني
 
و أكيد نسينى ..

وإنتا يا عينى

تفتكره بردو ! ..


وفى روحي نوّه

ع القسوه ناويه ..


وفى عقلي واحد

للذكرى يمسح ..


فترجع كأنـك

واحد جديد ..

فى الرحله ساير ,

للكل ســايـع ,

ولسه قادر

تفرح كتير ..

بقايا انثي ..

بقايا أنثى ..
مٌبعثـَره .. ضاعت أجزاء روحها
ما بين ماضٍ وحاضر
صارت محكومه بمن يملك أجزائها الضائعه
فأصابها التشوش فى فهم ذاتها


 فقيرة من بعدك
فقيرة إليك
كل ممتلكاتها
 قدرا كافيا من العقل .. يرجوها النسيان
وقدرا اكبر من السذاجه .. لكيّها بالحنين


 محاصره بك
ليس بداخلك
لكن بكل ما خارجك
سجنها هو الكون
وتكبيلها بوريد قلبك حريتها




و هائمه .. تتشبث بلا جدوي بأسربة الخلاص
تتنصل بلا جدوى من رسائل , من روائح , من ورود
أملها بلا جدوى
يأسها بلا جدوي
أي جدوى تنالها  من مسكنات
أي جدوي ينالها طفل رضيع من مأكولات
فقلبها رضيع قلبك
يستجدي منه الفطام

خيال مآتـه

بتفكر ليه ربك

خلقك كده بالشكل ده

اختارك ابن الأم دي والأب ده..

من عيلة مستوره والقشيه معدن وكله رضا

ساكن فى حارة لقمه هنيه تكفى ميه

واللى ما يشبع من عيالها يكملها ميه

بتنام تقوم وشك مكشر

شايل هموم تنسّي عقلك

لو بالكأبه كان غيرك أشطر

خلاص خلاص وكمان بلاش

افتـّح بيبان

و كل ما هسأل

تهرب تلاوع

وتبين إنك عيل جبان

أنا بس عايزه أفهمك

إن ياما جه من ضهر باشا ولد تلفان

وياما نبت من تحت كوع الفقر أبو الجدعان

وإن اللى عايز يوهمك..

إن ربك إدالك الأربعه و عشرين قيراط

فى النطرون وفي بولاق

وإن فاسك خساره تنضرب فى هالعذاب

دي الأولى مالحه والتانيه مش أرض الميعاد

وإنه رزقهم لغيرك إشي فى فرنسا وإشي عالسحاب

وكان ايه يحصل لو تبدّل مع ابن الذوات ؟

ما هوّ إلا خيال مآتـه

فارد دراعاته فى وسط غابتك

راهن سعادتك باللى مش فى ايدين سعادتك

عايزك كده خايف تقرب م اللى عندك

لحسن تصحصح وتفوق لنفسك

وتكون أول ضربه لفاسك

نصل فى رقبة نعاستك

اللى فى الأصل خيال مآته

فاعرف ان كله واخد الأربعه وعشرين قيراط

على طله واحده ووجه بحري بالتصريفات

بس دي تصلح نخيل

ودي تصلح لمانجه

ودي لمكسرات

مش بالمزاج لأ ولا بالمزاد

لكن ربك خلقك كده بالشكل ده

لغرض فى نفسه..

ومش تفرقه ..

15 - 5 - 2011

حبيـ♥ـتك

تخيـّـل حبّـيت سنانك الصفرا
حبّـيت بَرجلتـَّـك فى الأكل واحنا عالسٌـفرا
و وحشتني عينيك الشارده من التعب
وهيا غرقانه ما بين الورق

تعرف كمان ؟
بتعجبني طريقتك فى الكلام
وحشرجة صوتك لما تزعقلي
ونعومته لما تصالحني

تعرف كمان ؟
بحب أناغشكك
أخطف سجايرك
أخبي ولاعتك
وأقعد أعاكسك
ولـَجل ما أشغلك عنهم
أفضل أكلمك عن فلان وفلان
وأتـلذذ بعينيك بتطـّق شرار
وأقولك إيه مالك ؟
بتغير؟! :)
تقول يا سلام
وتعمل زعلان
وتشخط طاب هاتي العلبه والولاعه
ويلا سلام

ألحقك بـِضحكه ..
ولمسة إيد على خدك
وأقولك مين قدك
سحرتني حتى بغلطاتك
ووهمتني بكل صفاتك
حبيتك كدا زي مانتا
ووهبت كٌـلي عشانك

تبصلي ببراءة الأطفال
تنطق تقولي
هتعيشي عمرك ليا ؟
وتحطي إيدك فى إيديا لما أشيب ؟
هتحبيني برغم التجاعيد ؟
هتفتكريني بعد ما ...

أحط إيديا على شفايفك .. متكملهاش

تحضني تقولي ..
خايفه عليا؟

تسري فى جسمي رعشه غريبه
أهمسلك ..
وإيه يسوى الواحد من غير روح ..

- صــوت صفاره -

مِـسكت إيده تـجـسّ الـنـبـض
طلعت صرخه بـِعـلو الصوت
متتسمعش برّه القلب
تاهت العين فى تفاصيل الأوضه
إنسدل الجفن

همسِـت بصوت مبحوح ..
إيه يسوى الواحد من غير روح ..

مراسم التغيير ..

‫غَيَّرَت نِظَام الاوضَه


فِى اركَانهَا طوِيَت الذِّكرَى


قَصَّيت كَمَان انَا شـَعرِي


كُنْت انتا تحِبُه طَوِيْل


مَسدول مغطِيلي كتِفي


ومِمَوّج تبّحـَر فِيْه


خَلَعْت الْحٌزن مِن تُوبي


وَفصّلت مِ الْفَرحَه جدِيد


وصِرت انَا احكِي وَاتحَاكى


بالَغنا وَالْرَقص وَالتَنطيط


قَالولِي وصَمْتِك الْجَاير ..


والْمَنْطِق الْغَاير ..


وعَقْلِك الحَاير ..


لِمِيْن رَاح يسَيبوكِي ؟ !


رَدَّيت رَاح يلاقوا لِغَيرِي سَبِيِل


لَكِن انا لِفِين وَدُونِي ؟!


وَعَلَى ايَه تَبكِي عُيُونِي ؟


عَلَى فِكر


ما وصَلَنِي


إِلَا


لِتَيْه !

مغلوبون على امرهم

ليسوا بطيبين .. لكن مغلوبون على امرهم

فهو لا يملك ان يٌخالف مديره او يٌعنفه
هي لا تملك ان تٌعاتب زوجها او تٌناقشه
هو لا يملك ذكاءا كافيا ليدافع عن مستحقاته
هي لا تملك إلا الإنصياع لاوامر والدها

هم لا يملكون خيارا غير طيبتهم
ترى إن كانو يملكون خيارات .. سيختارون الطيبه ؟!

__
ليسو بشرفاء .. لكن مغلوبون على أمرهم

فهو لا يملك ان يٌغازل امام زوجته
هي لاتملك ان تتبرج فى صحبة اخيها
هو لا يملك ان يرتشي فى وجود كاميرات
هي لا تملك إلا الوفاء لزوج يأسرها بسجن يٌسميه منزلها

هم لا يملكون خيارا غير الشرف
ترى ان كانوا يملكون خيارات .. سيختارون الشرف ؟!
__
ليست الفضائل بتصرفات و ظواهر
وليست ايضا بفروض وقواعد
بل يجب ان يكونوا خيارا ليكتسبو قيمتهم
فكلنا نعرف ان لا قيمه للنجاح بالتزكيه
وكلما احتدمت المنافسه , ارتفعت قيمة الرابح


هل احكم على شخص ترفع عن خيانة الأمانه
مثلما احكم على شخص خطط لخيانتها وفشل !!..


يجب ان يٌعطى الأنسان كامل حٌريته .. لٌيظهر معدنه

فالأنسان اللذي يٌمنع من ارتكاب الذنب .. ليس صالحا بالمعنى الحقيقي للصلاح .... ولكنه مغلوب على امره...

فلا قيمه لصلاح ينهار امام اول عاصفه شهوائيه تهب عليه
ولا يخدعنك استمرار صلاحه لتأخر العاصفه .. فهي اتيه لا محاله


انا لا يٌهمني ظاهرك .. قدر اهتمامي بكونه اختيارك .. وان تكون ولي على امرك .. وليس مغلوبا ..
30 March 2011