شهيد

و كأني نايم في توب جميل

أبيض في أبيض منقوش نخيل

وخير .. اللهم اجعله خير !

أصحى على صوت نواح وعويل

دي عيلتي دي المِتجمعه ؟

طب ليه عينيهم مدّمعه ؟

وجيراني ليه بيواسوا أمي ويطبطبوا

وعيونها امتى للعياط هيبطلوا

لا يكون ده صوان وفاتي ؟!

ويكونشي ده تأبين مماتي ؟!

مش لو كنت أنا

مٌت أساساًً !

كنتوا ساعتها تزعلوا ؟

عارف لفراقي بتندبوا

لكن يا ريت تتمهلوا

وتفكروا

لإن الإصابه

لو مش بالرصاصه

كانت هاتبقى

بميت طبنجه متعمرّه

بـِ علّه ومراره

وحياه م الهموم متكدره 


كانت هاتبقى

في غرق العباره

ولّا

في وقوع أي عماره

أو حتى

في خناقة

على عيش

في زنقة حاره ..